நீங்கள் தேடியது "லாரி டிரைவர்"

திருவண்ணாமலை:

திருவண்ணாமலை மாவட்டம் கலசபாக்கம் அருகே உள்ள நவாபாளையம் பகுதியை சேர்ந்தவர் திருப்பதி (வயது 42) லாரி டிரைவர். இவரது மனைவி சுமதி. இவர்களுக்கு 2 மகள்கள் 1 மகன் உள்ளனர்.

திருப்பதி குடும்பத்துடன் திருவண்ணாமலை கலெக்டர் அலுவலகத்திற்கு இன்று காலை வந்தார். கலெக்டர் கார் நிறுத்தும் இடத்தில் திடீரென தான் மறைத்து கொண்டுவந்த கேனில் இருந்த மண்எண்ணையை மனைவி, 2 மகள்கள், மகன் மீது ஊற்றினார். பின்னர் அவர் மீதும் ஊற்றிக் கொண்டு குடும்பத்துடன் தீக்குளிக்க முயன்றனர்.

இதனை கண்ட அங்கிருந்த பாதுகாப்பு போலீசார் தடுத்தி நிறுத்தினர். அங்கு வந்த தனி துணை கலெக்டர் வில்சன் ராஜசேகர் திருப்பதியிடம் விசாரணை நடத்தினார்.

அப்போது 4 ஆண்டுகளுக்கு முன்பு பசுமை திட்டத்தின் கீழ் கட்டிய வீட்டை எனது அண்ணனிடம் ரூ.2 லட்சத்திற்கு அடமானம் வைத்து பணம் பெற்றேன். தற்போது அந்த பணத்தை முழுவதுமாக திருப்பி செலுத்திய பின்னரும் வீட்டின் பத்திரத்தை திருப்பி கொடுக்க மறுக்கிறார்.

இது குறித்து கேட்ட போது மேலும் ரூ.10 லட்சம் தரும்படி கூறி வீட்டையும் தன் பெயரில் மாற்றி கொடுக்குமாறு மிரட்டி வருவதோடு தற்போது வீட்டை பூட்டி விட்டு எங்களை வெளியேற்றி விட்டார். எனவே அவர் மீது நடவடிக்கை எடுத்து எனது வீட்டை மீட்டு தரும் படி கூறினார்.

இது சம்பந்தமாக உரிய நடவடிக்கை எடுக்கபடும் மேலும் அந்த பகுதி அதிகாரிகளிடம் கூறி வீட்டை திறக்க நடவடிக்கை எடுக்கபடும் என உறுதியளித்தார்.இதையடுத்து அவர்கள் அங்கிருந்து புறப்பட்டு சென்றனர்.

குடும்பத்துடன் லாரி டிரைவர் தீக்குளிக்க முயன்ற சம்பவம் அப்பகுதியில் பரபரப்பை ஏற்படுத்தியது.

நாமக்கல்:

மோகனூர் அருகே உள்ள செவந்திப்பட்டி பனமரத்துப்பட்டியை சேர்ந்தவர் கிருஷ்ணன். லாரி டிரைவர். இவர் நேற்று தனது மனைவி சுமதி மற்றும் மகளுடன் நாமக்கல் மாவட்ட கலெக்டர் அலுவலகத்திற்கு மனு கொடுக்க வந்தார். கலெக்டர் ஆசியா மரியத்திடம் மனு கொடுத்த கிருஷ்ணன், திடீரென 25 ஆண்டுகளாக பட்டா மாறுதல் செய்து தராமல் அதிகாரிகள் அலைக்கழித்து வருவதாக கூறி கோஷம் எழுப்பினர். இதனால் குறைதீர்க்கும் நாள் கூட்டத்தில் பரபரப்பு ஏற்பட்டது. இதையடுத்து அதிகாரிகள் கிருஷ்ணனை குடும்பத்துடன் வெளியேற்ற போலீசாருக்கு உத்தரவிட்டனர். இருப்பினும் பட்டா மாறுதல் வழங்காததை கண்டித்து கோஷங்கள் எழுப்பியவாறு வந்த அவர்கள் கலெக்டர் அலுவலக பிரதான வாயில் அருகே படிக்கட்டில் அமர்ந்து தர்ணாவில் ஈடுபட முயன்றனர். அவர்களை போலீசார் சமரசம் செய்து விசாரணைக்காக ஜீப்பில் அழைத்து சென்றனர். பின்னர் அவர்களை எச்சரிக்கை செய்து அனுப்பி வைத்தனர்.

இதற்கிடையே கிருஷ்ணன் தமிழக முதல்-அமைச்சரின் தனிப்பிரிவுக்கு அனுப்பி உள்ள மனுவில் கூறியிருப்பதாவது:- எனது தந்தை பழனியப்பன், தாத்தா பெரியண்ணன் ஆகியோர் கடந்த 1982-ம் ஆண்டு ராமனுஜம் வகையறாகளிடம் இருந்து கிரையம் பெற்று, தங்கள் பெயரில் பட்டா மாறுதல் செய்து அனுபவித்து வந்த சுமார் 8 ஏக்கர் நிலம், 1986-ம் ஆண்டு நிலஅளவை மேம்பாட்டு திட்டத்தில் குட்டை என மாறுதல் செய்யப்பட்டதால், எங்கள் வாழ்வாதாரம் முடங்கி விட்டது.

எனது தந்தை பலமுறை அரசு அதிகாரிகளிடம் மனு கொடுத்தும், பட்டா மாறுதல் செய்யாததால், நாமக்கல் உரிமையியல் நீதிமன்றத்தில் வழக்கு தாக்கல் செய்யப்பட்டு, எங்களுக்கு சாதகமாக தீர்ப்பு பெறப்பட்டது. இந்த தீர்ப்புக்கு பிறகும் அதிகாரிகள் எங்கள் பெயரில் நிலங்களை பட்டா மாறுதல் செய்யாமல் காலம் கடத்தி வருகிறார்கள். நானும் பலமுறை மனு கொடுத்தும் பட்டா மாறுதல் செய்ய எந்த நடவடிக்கையும் எடுக்கப்படவில்லை.

இந்த நிலையில் கடந்த மாதம் 18-ந் தேதி செவிந்திப்பட்டி கிராம நிர்வாக அலுவலர் என்னிடம் அந்த நிலங்களை எனது பெயருக்கு பட்டா மாறுதல் செய்ய இயலாது என்றும், சிவில் நீதிமன்றத்தில் தாங்கள் பெற்ற தீர்ப்பை எதிர்த்து அப்பீல் செய்ய நடவடிக்கை எடுக்கவும் அதிகாரிகள் அறிவுரை வழங்கி உள்ளதாகவும் கூறினார்.

நாங்கள் சிவில் நீதிமன்றத்தில் தீர்ப்பு பெற்று 25 ஆண்டுகள் முடிந்து விட்டது. இந்த நிலையில் இவ்வழக்கை அரசு அப்பீல் செய்ய உள்ளதால், தொடர்ந்து வழக்கை நடத்த எங்களுக்கு வசதி இல்லை. மேலும் கடன் பிரச்சினையும் நிறைய உள்ளது. இதனால் நான் என் குடும்பத்துடன் கலெக்டர் அலுவலக வளாகத்தில் தீக்குளித்து தற்கொலை செய்துகொள்ள முடிவு செய்துள்ளேன். இவ்வாறு அதில் கூறி இருந்தார். #tamilnews

திண்டிவனம்:

பண்ருட்டியில் இருந்து கத்தரிக்காய் லோடு ஏற்றிக்கொண்டு சென்னை கோயம்பேடு மார்க்கெட்டுக்கு ஒரு மினிலாரி புறப்பட்டது. இந்த லாரியை சென்னை கொருக்குப்பேட்டையை சேர்ந்த டிரைவர் சலீம்(வயது 35) ஓட்டி வந்தார். அந்த லாரி திண்டிவனம் கருணாவூர்பேட்டை புறவழிச்சாலையில் நேற்று இரவு 9.30 மணிக்கு வந்தது.

அப்போது லாரியை சாலையோரம் நிறுத்திய சலீம் கீழே இறங்கி சென்னையில் உள்ள தனது லாரி உரிமையாளரிடம் செல்போனில் பேசி கொண்டிருந்தார். இதனை நோட்டமிட்ட மர்ம மனிதர்கள் 3 பேர் ஒரு மோட்டார் சைக்கிளில் அங்கு வந்தனர். பின்னர் அவர்கள் சலீமிடம் திண்டிவனத்துக்கு எப்படி செல்லவேண்டும் என்று பேச்சு கொடுத்தனர். அதற்கு எனக்கு வழி தெரியாது என்று சலீம் கூறினார்.

திடீரென அந்த மர்ம மனிதர்கள் சலீமை தாக்கினர். உன்னிடம் உள்ள பணத்தை கொடு, இல்லையென்றால் உன்னை கொலை செய்து விடுவோம் என்று மிரட்டினர். பணம் கொடுக்க முடியாது என்று சலீம் கூறினார். இதை கேட்டு ஆத்திரம் அடைந்த அவர்கள் 3 பேரும் சேர்ந்து கத்தியால் சலீமை சரமாரியாக குத்தினர். இதில் பலத்த காயம் அடைந்த அவர் மயங்கி விழுந்தார்.

இதையடுத்து சலீமின் சட்டை பாக்கெட்டில் இருந்த ரூ.16 ஆயிரத்து 500 பணத்தை அந்த மர்ம மனிதர்கள் கொள்ளையடித்தனர். பின்னர் மோட்டார் சைக்கிளில் ஏறி தப்பி சென்றுவிட்டனர். இதனை அந்த வழியாக சென்றவர்கள் பார்த்து திண்டிவனம் போலீசுக்கு தகவல் தெரிவித்தனர். அதன்பேரில் போலீசார் சம்பவ இடத்துக்கு வந்தனர். பலத்த காயம் அடைந்த சலீமை மீட்டு சிகிச்சைக்காக திண்டிவனம் அரசு ஆஸ்பத்திரிக்கு அனுப்பி வைத்தனர்.

இது பற்றிய புகாரின் பேரில் போலீசார் வழக்குப்பதிவு செய்து டிரைவர் சலீமை தாக்கி கொள்ளையடித்த மர்ம மனிதர்களை வலைவீசி தேடி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தியது. #tamilnews

குமாரபாளையம்:

கோவையில் இருந்து சரக்கு ஏற்றிக்கொண்டு கனரக லாரி ஒன்று, நாமக்கல் மாவட்டம் வழியாக சேலத்திற்கு வந்து கொண்டிருந்தது.

இன்று அதிகாலை 3.30 மணி அளவில் நாமக்கல் மாவட்டம் குமாரபாளையம் அருகே சித்தேடு போலீஸ் நிலைய எல்லைக்கு உட்பட்ட காவிரி ஆற்று பாலத்தில் லாரி வந்தபோது, திடீரென 23-வது பக்கவாட்டு தூணை உடைத்துக் கொண்டு ஆற்றுக்குள் பாய்ந்தது. இதில் பாலத்தின் கைப்பிடி சுவர் மட்டும் 40 அடி நீளத்திற்கு உடைந்தது.

காவிரி ஆற்றில் விநாடிக்கு சுமார் 1 லட்சம் கன அடிக்கு மேல் தண்ணீர் பெருக்கெடுத்து ஓடுகிறது. இதனால் லாரி, ஆற்றுக்குள் பாய்ந்த வேகத்தில் அப்படியே நீருக்குள் முழுவதும் மூழ்கியது. அதன் பாகம் எதுவும் வெளியே தெரியவில்லை. இந்த பாலத்தின் ஒருபுற பகுதி ஈரோடு மாவட்ட எல்லைக்குள்ளும், மறுபுற பகுதி நாமக்கல் மாவட்ட எல்லைக்குள்ளும் அமைந்துள்ளது.

இதனால் தகவல் அறிந்ததும் ஈரோடு மாவட்ட கலெக்டர் பிரபாகரன், போலீஸ் சூப்பிரண்டு சக்தி கணேஷ் தலைமையில் டி.எஸ்.பி.க்கள் சம்பவ இடத்திற்கு வந்து, பாலத்தில் ஏற்பட்டு உள்ள சேதத்தை பார்வையிட்டு ஆய்வு செய்து, ஆற்றுக்குள் பாய்ந்த லாரியை மீட்கும் நடவடிக்கையில் ஈடுபட்டனர்.

இந்த பணியில் ஆயுதப்படை போலீசார், சித்தோடு, பாவானி, குமாரபாளையம் போலீஸ் நிலையத்தை சேர்ந்த 100-க்கும் மேற்பட்ட போலீசார் ஈடுபட்டுள்ளனர்.

முதற்கட்டமாக பாலத்தில் வாகன போக்குவரத்து தடை செய்யப்பட்டது. இந்த பாலத்தின் அருகே மற்றொரு பாலம் உள்ளது. சேலத்தில் இருந்து கோவை செல்லக்கூடிய இந்த பாலம் வழியாக போக்குவரத்து திருப்பி விடப்பட்டது.

அதுபோல் குமாரபாளையம் தாசில்தார் ரகுநாதன், பவானி தாசில்தார் தலைமையில் வருவாய் துறையினரும் பாலத்தில் ஏற்பட்ட சேதத்தை பார்வையிட்டு ஆய்வு செய்தனர். அவர்களும் ஆற்றுக்குள் பாய்ந்த லாரியை மீட்கும் பணியில் ஈடுபட்டுள்ளனர்.

குமாரபாளையம், பவானி, சித்தோடு, ஈரோடு, திருச்செங்கோடு பகுதிகளை சேர்ந்த தீயணைப்பு நிலைய அலுவலர் தலைமையில் 40-க்கும் மேற்பட்ட வீரர்கள் அங்கு தயார் நிலையில் நிறுத்தப்பட்டுள்ளனர். அவர்கள் ரப்பர் படகை தயார் நிலையில் வைத்துள்ளனர்.

இதனிடையே லாரியின் டீசல் பாகம் உடைந்து குபு, குபுவென டீசல் வெளியேறி ஆற்று வெள்ளத்தில் பாய்ந்தது. வெள்ளம் கரைபுரண்டு ஓடுவதால் லாரியில் இருந்தவர்களின் கதி என்ன? என்று கண்டுபிடிக்க முடியாத நிலை ஏற்பட்டு இருக்கிறது.

ஆகவே, போலீசார், காவிரி கரையோரம் வசிக்கும் மீனவர்களின் உதவியை நாடினார்கள். மீனவர்கள் லாரி விழுந்த பகுதியில் மூழ்கினார்கள். ஆனால், ஆற்றில் நீரின் இழுப்பு விசை அதிகமாக இருந்ததால் அவர்களால் ஆற்றின் அடிப்பகுதி வரை செல்ல முடியவில்லை.

இதனை தொடர்ந்து ஈரோட்டில் இருந்து 2 பெரிய ராட்சத கிரேன்கள் கொண்டு வரப்பட்டு, அதன் உதவியுடன் லாரியை மீட்கும் பணியில் அதிகாரிகள் ஈடுபட்டு வருகிறார்கள். மீனவர்கள் நீரில் மூழ்கி கிரேன் கம்பிகளை லாரியில் மாட்டினார்கள். பின்னர் லாரியை வெளியே தூக்கியபோது, ஒவ்வொரு பாகங்களாக உடைந்து வந்தது. இதனால் லாரியை மீட்கும் பணியில் சிரமம் ஏற்பட்டது. கடும் போராட்டத்திற்கு பிறகு ஒரு கிரேன் மூலம் லாரி பாதி அளவுக்கு நீரின் மேலே தூக்கப்பட்டுள்ளது.

இதனிடையே லாரியில் இருந்தவர்களின் கதி என்ன? என்று தெரியாததல் பரிசல்கள் மூலம் தேடும் பணி நடைபெற்று வருகிறது. #CauveryRiver

தென்காசியை சேர்ந்தவர் சாமுவேல், லாரி டிரைவர்.இவர் கடந்த 1-ந் தேதி மீஞ்சூரில் இருந்து கும்மிடிபூண்டிக்கு லாரியில் நிலக்கரி ஏற்றி வந்தார். பொன்னேரி நெல் காஸ்ட் கம்பெனி அருகில் வந்தபோது பைக்கில் வந்த 2 வாலிபர்கள் லாரியை வழிமறித்து டிரைவர் சாமுவேல், கிளீனர் இம்மானு வேலை தாக்கி பணம் கேட்டு மிரட்டினர். பின்னர் அவர்கள் அங்கிருந்து தப்பி சென்றுவிட்டனர்.

இதுகுறித்து டிரைவர் சாமுவேல் பொன்னேரி போலீஸ் நிலையத்தில் புகார் செய்தார். போலீசார் வழக்குப் பதிவு செய்து பொன்னேரியை அடுத்த திருஆயர்பாடியை சேர்ந்த அருண், பொன்னேரியை சேர்ந்த ராஜாவை கைது செய்து விசாரித்து வருகின்றனர்.

வேலூர்:

திருவண்ணாமலை மாவட்டம் செங்கம் தாலுகா உச்சிமலைக்குப்பம் கிராமத்தைச் சேர்ந்தவர் ராமு (வயது 37), லாரி டிரைவர். இவர், டீசல் நிரப்புவதற்காக நேற்று முன்தினம் இரவு பெங்களூருவில் இருந்து சென்னைக்கு லாரியை ஓட்டி சென்றார். வேலூர் அப்துல்லாபுரம் மேல்மொணவூர் அருகே தேசிய நெடுஞ்சாலையில் அதிகாலை 3.30 மணியளவில் சென்று கொண்டிருந்தபோது, லாரிக்கு பின்னால் பெங்களூருவில் இருந்து சென்னைக்கு பயணிகளை ஏற்றிக் கொண்டு ஆம்னி பஸ் ஒன்று வந்தது.

அப்போது அந்த வழியாக சைக்கிளில் வந்த ஒருவர், மேல்மொணவூர் அருகே சாலையை கடக்க முயன்றதாக கூறப்படுகிறது. இதைப்பார்த்த ராமு, தான் ஓட்டி வந்த லாரியை அவர் மீது மோதாமல் இருக்க, லாரியை மெதுவாக இயக்கியதாக தெரிகிறது. அப்போது பின்னால் வந்த ஆம்னி பஸ், திடீரென லாரியின் மீது மோதியது. மோதிய வேகத்தில் லாரி சாலையில் தலைக்குப்புற கவிழ்ந்து விபத்துக்குள்ளானது.

மேலும் டிரைவரின் கட்டுப்பாட்டை இழந்து ஓடிய ஆம்னி பஸ், சைக்கிளில் சாலையை கடக்க முயன்றவர் மீது மோதி, பின்னர் சாலையின் தடுப்பில் ஏறி ஓடி சிறிது தூரத்தில் போய் நின்றது. அதில் ஆம்னி பஸ்சில் பயணம் செய்த 30 பயணிகள் அதிர்ஷ்டவசமாக உயிர்தப்பினர்.

இந்த விபத்தில் லாரிக்குள் சிக்கிய ராமு சம்பவ இடத்திலேயே பரிதாபமாக செத்தார். சைக்கிளில் வந்து சாலையை கடக்க முயன்றவர் காயம் அடைந்து சாலையில் துடித்துக் கொண்டிருந்தார். அவரை, அக்கம் பக்கத்தில் இருந்தவர்கள் மீட்டு வேலூர் அடுக்கம்பாறை அரசு மருத்துவமனைக்கு சிகிச்சைக்காக அனுப்பி வைத்தனர். இந்த விபத்தால் தேசிய நெடுஞ்சாலையில் போக்குவரத்துப் பாதிப்பு ஏற்பட்டது.

இதுகுறித்து தகவல் அறிந்ததும் விரிஞ்சிபுரம் போலீசார் சம்பவ இடத்துக்குச் சென்று போக்குவரத்தை ஒழுங்குப்படுத்தும் பணியில் ஈடுபட்டனர். ராமுவின் பிணத்தை மீட்டு பிரேதப் பரிசோதனைக்காக வேலூர் அடுக்கம்பாறை அரசு மருத்துவமனைக்கு அனுப்பி வைத்தனர். இந்த விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். விபத்தில் இறந்த ராமுவுக்கு ஒரு மகன், மகள் உள்ளனர். 

ஆலந்தூர்:

திரிசூலம் இலுப்பை கோவில் தெருவைச் சேர்ந்தவர் சுரேஷ்குமார் (24). மினி லாரி டிரைவர் நேற்று முன்தினம் இரவு மடிப்பாக்கத்தில் உள்ள ஒரு பாரில் மது குடித்தார்.

அவருக்கு அருகே 5 பேர் கும்பலும் மது குடித்துக் கொண்டிருந்தனர். குடிபோதையில் இவர்களுக்கும், சுரேஷ்குமாருக்கும் இடையே வாக்குவாதம் ஏற்பட்டது.

பின்னர் அது முற்றி தகராறு ஏற்பட்டது. அப்போது ஆத்திரம் அடைந்த கும்பல் சுரேஷ்குமாரை சுற்றி வளைத்து சினிமா பாணியில் பீர் பாட்டில்களால் தலையில் ஓங்கி அடித்து தாக்கினர்.

மண்டை உடைந்ததால் நிலை குலைந்த சுரேஷ்குமார் ரத்த வெள்ளத்தில் மயங்கி விழுந்தார். உடனே அக்கும்பல் அங்கிருந்து தப்பி ஓடி விட்டது.

தகவல் அறிந்து அங்கு வந்த போலீசார் சுரேஷ்குமாரை மீட்டு ராஜீவ்காந்தி அரசு ஆஸ்பத்திரியில் சேர்த்தனர். அங்கு சிகிச்சை பலனின்றி நேற்று இரவு அவர் பரிதாபமாக இறந்தார்.

இதுகுறித்து மடிப்பாக்கம் போலீசார் கொலை வழக்கு பதிவு செய்தனர். சந்தேகத்தின் பேரில் ராஜா, சுடலை ராஜன், ராமச்சந்திரன், திலீப், கலைமணி ஆகிய 5 பேரை கைது செய்தனர்.

முன் விரோதத்தில் இக்கொலை நடந்ததா? அல்லது கொடுக்கல் வாங்கல் தகராறு காரணமா? என விசாரணை நடைபெற்று வருகிறது.